dil ko harif-e-gardish-e-dauran kiye hue
baiTha hua huun ziist ka saman kiye hue
ab mushkilat-e-rah-e-mohabbat ka zikr kya
ik umr ho ga.i inhen asan kiye hue
piita huun roz piita huun talḳhaba-e-umid
ehsas-e-lutf-e-saqi-e-dauran kiye hue
bahla raha huun dil ko fareb-e-ḳhayal se
ummid-e-gham-gusari-e-yaran kiye hue
but-ḳhana-e-majaz se guzra huun barha
ḳhuddari-e-nigah numayan kiye hue
ab ja raha huun janib-e-mai-ḳhana-e-mughan
sad-ehtiram-e-hazrat-e-yazdan kiye hue
achchha to aaj sair-e-ḳharabat hi sahi
lekin ḳhayal-e-talḳhi-e-dauran kiye hue
baiThe hue hain bada-kashan-e-vafa ḳhamosh
ehsas-e-talḳh-kami-e-yaran kiye hue
dekho vo ja rahe hain harifan-e-tez-gam
azm-e-tavaf-e-manzil-e-janan kiye hue
ahbab-e-ḳhush-mazaq ka ehsan hai ye ‘raz’
muddat hui thi dil ko ghazal-ḳhvan kiye hue
Leave a Reply