masarraton ke khazane hi kam nikalte hain
kisi bhi siine ko kholo to gham nikalte hain
hamare jism ke andar ki jhiil suukh gai
isi liye to ab aansu bhi kam nikalte hain
ye karbala ki zamin hai ise salam karo
yahan zamin se patthar bhi nam nikalte hain
yahi hai zid to hatheli pe apni jaan liye
amir-e-shahr se kah do ki ham nikalte hain
kahan har ek ko milte hain chahne vaale
nasib valon ke gesu men kham nikalte hain
jahan se ham ko guzarne men sharm aati hai
usi gali se kai mohtaram nikalte hain
tumhi batao ki main khilkhila ke kaise hansun
ki roz khana-e-dil se alam nikalte hain
tumhare ahd-e-hukumat ka saneha ye hai
ki ab to log gharon se bhi kam nikalte hain