jo yad-e-yar se guft-o-shunid kar li hai
to goya phuul se ḳhushbu kashid kar li hai
juda.iyon men bhi DhunDi hain qurbaten main ne
zarar-rasan thi jo shai vo mufid kar li hai
nahin khule the jo manzar miri basarat par
tasavvurat men un ki bhi diid kar li hai
sitare Taank diye hain falak ki chadar par
aur apni chadar-e-shab be-navid kar li hai
main chahta to use kuchh qarib le aata
masarraton ki jo saa.at ba.iid kar li hai
use to dukh hi nahin kuchh miri juda.i ka
saza ḳhud apne liye hi shadid kar li hai
use bhulane ki koshish men yaad kar kar ke
ḳhud apni ziist hi mushkil mazid kar li hai
husain ibn-e-ali ki taraf hi lauTenge
jinhon ne bai.at-e-fikr-e-yazid kar li hai
ata-e-‘mir’ hai mujh par ki main ne bhi raushan
ghazal ki sham.a ba-tarz-e-jadid kar li hai
jacha hai ab kahin ja kar ‘nasim’ jama-e-zist
kahin kahin se jo qat-o-burid kar li hai
Leave a Reply