bhula huun main aalam ko sarshar ise kahte hain
masti men nahin ghafil hushyar ise kahte hain
gesu ise kahte hain rukhsar ise kahte hain
sumbul ise kahte hain gulzar ise kahte hain
ik rishta-e-ulfat men gardan hai hazaron ki
tasbih ise kahte hain zunnar ise kahte hain
mahshar ka kiya vaada yaan shakl na dikhlai
iqrar ise kahte hain inkar ise kahte hain
takrata huun sar apna kya kya dar-e-janan se
jumbish bhi nahin karti divar ise kahte hain
dil ne shab-e-furqat men kya saath diya mera
munis ise kahte hain gham-khvar ise kahte hain
khamosh ‘amanat’ hai kuchh uf bhi nahin karta
kya kya nahin ai pyare aghyar ise kahte hain
Leave a Reply