Farigh Bukhari
yadon ka ajiib silsila hai
soya hua dard jaag uTha hai
miT bhi chuke naqsh-e-pa magar dil
mahki hui chaap sun raha hai
jalti hui manzilon ka raahi
ab apna hi saaya DhunDhta hai
divaren khaḌi hui hain lekin
andar se makan gir raha hai
puchhe hai chaTak ke ghuncha-e-zaḳhm
ai ajnabi tera naam kya hai
sochon ke athah paniyon men
dil barf ka phuul ban gaya hai
kis shola-badan ki yaad aa.i
daman-e-ḳhayal jal uTha hai
taḳhliq men ḳhud chhupa hua hai
fankar bhi fitratan ḳhuda hai
murjha ke har ek zard patta
aveza-e-gosh ban gaya hai
socha hai ye main ne pi ke aksar
nashshe men ye raushni si kya hai
shaḳhon pe pujaranen saji hain
har phuul chaman ka devta hai
sahra-e-vafa men mere fan ki
ḳhushbu ka charagh jal raha hai
phir pa.enge ḳhaak se numu ham
‘farigh’ ye usul-e-irtiqa hai
iz.har ka jis ko hausla hai
vo apni sadi ka devta hai
mansur se kam nahin hai vo bhi
jo apni zaban se bolta hai
vo peḌ hai zindagi ki azmat
jo tund hava se laḌ raha hai
qatil ko dua.en do ki ‘farigh’
har zaḳhm-e-vafa ghazal-sara hai
Leave a Reply