Na Ibtida-E-Junun Hai Na Intiha-E-Junun

Suhail Kakorvi

na ibtida-e-junun hai na intiha-e-junun

bas ek fitna hai kahiye jise ada-e-junun

vo gul ki tarah se hansta hai meri halat par

irada ab hai koi aur gul khila.e junun

kamal ye hai ḳhirad bhi talash karti hai

bara-e-sajda-ta.azim naqsh-e-pa-e-junun

ye apni apni tabi.at hai kya kiya jaa.e

tumhen rula.e junun aur mujhe hansa.e junun

vajud-e-ashiq-o-ma.ashuq se jahan raushan

vo nur-e-vasl hai jis se ki jagmaga.e junun

asar ye hota hai suraj bhi jaag uTTha hai

ki chheḌ karti hai ghunchon se jab saba-e-junun

vo mujh se martaba-e-ishq men buland rahe

ḳhuda kare vo chala jaa.e mavara-e-junun

jo tujh ko chhuta hai anmol ho hi jaata hai

tire vajud men hai yaar kimiya-e-junun

‘suhail’ us ko bhi hai e’tiraf-e-jazba-e-shauq

vo ban gaya hai mubarak ho dil-ruba-e-junun