Saulat Zaidi
kanTon tumhen phulon ki chubhan yaad rahegi
bhuloge ki rudad-e-chaman yaad rahegi
kya bhulne degi vo mujhe rat-ki-rani
vo zulf vo ḳhushbu-e-badan yaad rahegi
ye zaḳhm-e-dil-e-zar to bhar ja.ega ik din
lekin tire mathe ki shikan yaad rahegi
tha saya-fagan jis pe koi fat.h ka parcham
vo laash bhi be gor-o-kafan yaad rahegi
manzil pe maza degi mujhe lazzat-e-manzil
ya.ani mujhe qadmon ki thakan yaad rahegi
ye sach hai mujhe daad ki ḳhvahish nahin ‘saulat’
na-qadri-e-arbab-e-suḳhan yaad rahegi
Leave a Reply