kaha tha us ne mohabbat ki aabru rakhna
chubhe hon kitne bhi kanTe gulon ki ḳhu rakhna
dilon ko toḌ na daale tumhari haq-goi
bajae harf ke aina ru-ba-ru rakhna
jo vaqt ahl-e-vafa se kabhi lahu mange
to sab se pahle lab-e-tegh par gulu rakhna
ḳhizan se haar na jaana kisi bhi halat men
numu mile na mile ḳhvahish-e-numu rakhna
bura na kahna zamane ko ham zamana hain
hamare ba.ad zamane se guftugu rakhna
faqih-e-shahr ke fatve ki haisiyat kya hai
to ḳhud ko apni nigahon men surḳh-ru rakhna
visal-e-dost ki saa.at bhi aane vaali hai
sahar qarib hai ‘akbar’ abhi vazu rakhna
Leave a Reply