Ghulam Husain Sajid
jahan men Dalte rahte hain ma-siva ki tarah
daraḳht chal nahin sakte magar hava ki tarah
bhaTak kar aa.i thi kuchh der ko idhar duniya
lipaT ga.i mire dil se kisi bala ki tarah
mire hisar se bahar bhi vo nahin rahta
mire qarib bhi aata nahin ḳhuda ki tarah
bahut se rang utarte hain meri ankhon men
kisi ke dhyan men uljhi hui sada ki tarah
utar gaya mire dil men vo be-dhaḌak lekin
labon par aa nahin paaya hai mudda.a ki tarah
ravan-davan hain mire as-pas ki ashiya
paḌa hua huun zamin par main naqsh-e-pa ki tarah
simaT sakunga na apne vajud men ‘sajid’
pahan liya hai kisi ne mujhe qaba ki tarah
Leave a Reply