Manish Shukla
ghabra kar aflak ki dahshat-gardi se
ham ne ḳhud ko toḌ diya bedardi se
jab ḳhud ko har taur bayaban kar Daala
tab ja kar baaz aa.e dasht-navardi se
ab bhi kya kuchh kahne ki gunja.ish hai
sab kuchh zahir hai chehre ki zardi se
ham ik baar bhaTak kar itna bhaTke hain
ab tak Darte hain avaragardi se
ham bhi ishq ki pagDanDi se guzre hain
vaqif hain pech-o-ḳham ki sar-dardi se
Leave a Reply