Poet
na aina hi us surat ke aage hakka-bakka hai
siyahi dekh us ke khat ke mad ki dil men lukka hai
hua insan numayan nur-e-zat-e-pak-vahdat se
ki jyuun khurshid ke partav se zarre men jhamakka hai
hua akhbar se sabit savab-e-hajj-e-akbar hai
ziyarat kar le ai ghafil dil-e-agah makka hai
bacha niin koi us zalim ke jaur-e-chashm-o-mizhgan se
vahan aina bhi shan-e-asal ka sa shabakka hai
jhuka kar ek main sar naam apna kar diya raushan
funun-e-ishq men kam koi parvana sa pakka hai
mavali-e-ali ka hai ba-khair anjam buujh ai ‘ishq’
khuda hafiz tira dozakh bhi ik sharai-e-dikka hai
Leave a Reply