Kitni Der Aur Hai Ye Bazm-E-Tarab-Nak Na Kah

kitni der aur hai ye bazm-e-tarab-nak na kah

raas aati hai kise gardish-e-aflak na kah

kyuun Thaharta nahin gulzar men koi mausam

kya kashish rakhti hai ḳhushbu-e-tah-e-ḳhak na kah

dekh to rang tamannaon ki betabi ke

kal fana hai magar ai sahab-e-idrak na kah

dard ki aanch abad tak hai kisi ruup men ho

aaj ke phuul ko a.inda ke ḳhashak na kah

lafz ki zarb to hai sa.iqa-o-sang se saḳht

dil bahut narm hain na-gufta-o-be-bak na kah

gham-gusaron ko bhi hai apne hi alam se kaam

dil pe jo biiti hai ai dida-e-namnak na kah

shauq hi ziist bhi hai ziist ki agahi bhi

is masiha-nafas-azar ko saffak na kah

dil-e-farhad junun-fahm ko nadan na samajh

chashm-e-parvez-e-tunuk-hosh ko chalak na kah

ḳhud-numa.i thi ki tha mahbas-e-pindar ka ḳhauf

qais ke jaib-o-gareban rahe kyuun chaak na kah

bujh na jaa.en kahin dil ahl-e-tamanna ke ‘ziya’

kaise sho.alon se hai ye jashn-e-tarab-nak na kah