vahi gul hai gulistan men vahi hai shama mahfil men
vahi yusuf hai zindan men vahi laila hai mahmil men
hazaron ban gai hain kushtagan-e-khal ki qabren
jagah til bhar nahin baaqi zamin-e-ku-e-qatil men
nahin raushan dilon ki qadr kuchh arbab-e-zahir ko
ijazat baithne ki shama ko di kis ne mahfil men
ye aalam nuur ka hai jalva-e-dagh-e-mohabbat se
nahin kuchh farq mere dil men aur khurshid-e-manzil men
syahi-e-khun-e-sauda ki ye vaqt-e-qatl kaam aai
lagaya surma chashm-e-jauhar-e-shamshir-e-qatil men
ye kis zohra-jabin ki anjuman men aamad aamad hai
bichhaya hai qamar ne chandni ka farsh mahfil men
nazar aata nahin manind-e-abru ek mah-e-nau
mahinon rahti hain vo hasraten madd-e-muqabil men
na ho munkir na ho munkir khuda vo hai khuda vo hai
rujua qalb ho jaate hai jis ki samt mushkil men
nahin jauhar liye hain bas-ki shauq-e-qatl men bose
hamare naqsh-e-dandan hain lab-e-shamshir-e-qatil men
vo avara huun main hai khatm mujh par tez-raftari
ki hain miqraz donon paanv mere qat-e-manzil men
tumhare gesu-e-pechan ki jab tarif likhta huun
qalam paband ho jaata hai misron ki salasil men
falak par jaae iisa hai gaya zer-e-zamin qarun
zamin-o-asman ka farq paaya haqq-o-batil men
bashar tanha nahin divane us shamshad-qamat ke
shajar jakde hue hain ishq-e-pechi ki salasil men
mita harf-e-mohabbat aap ke aariz pe khat nikla
hamara naam ab likhiye to likhiye fard-e-batil men
umid-e-maadilat us shaah se hai mujh ko ai ‘nazim’
hui jis ki viladat bhi zaman-e-shah-e-adil men
Leave a Reply