Poet
ahl-e-jahan ke saath vafa ya jafa karun
meri samajh men kuchh nahin aata hai kya karun
ye dard-e-dil to hasil-e-umr-daraz hai
main is ko apni zaat se kyuun kar juda karun
duniya yahi karegi to duniya se peshtar
majruh kyuun na ḳhud hi main apni ana karun
duniya men kaun hai jo nahin hai mire ḳhilaf
ik tum hi rah ga.e ho tumhen bhi ḳhafa karun
har zaviye se ziist ne rusva kiya mujhe
kis ruḳh se apni zaat ka ab samna karun
ehsan jo uTha.e hain auron ke vaste
auron pe hain vo qarz magar main ada karun
ankhon ko niind ki bhi rifaqat nahin nasib
main sham.a to nahin ki sahar tak jala karun
hasrat hi rah ga.i ki baharon ke darmiyan
tere baghair bhi to kabhi ḳhush raha karun
beganagi ko chhoḌ ke fitrat bhi hans paḌe
aadam ke naam par koi aisi ḳhata karun
jab karb-e-agahi men huun ai ‘lais’ aj-kal
is karb-e-agahi se kise ashna karun
Leave a Reply