Ai Aah Teri Qadr Asar Ne To Na Jaani

ai aah tiri qadr asar ne to na jaani

go tuj ko laqab ham ne diya arsh-makani

yak khalq ki nazron men subuk ho gaya lekin

karta huun main ab tak tiri khatir pe girani

tuk dida-e-tahqiq se tu dekh zulekha

har chaah men aata hai nazar yusuf-e-sani

mamur hai jis roz se virana-e-duniya

har jins ke insan ki ye maati gai chhani

ik vamiq-e-nau ka hai samajh chaak gareban

karti hai jo rakhna koi divar purani

bulbul hi sisakti na thi kuchh baagh men tujh bin

shabnam gulon ke munh men chuvati rahi paani

hai gosh-zada khalq mira qissa-e-jan-kah

jab se ki na samjhe tha tu chidiya ki kahani

juun shama mujhe sharm hai zunnar ki ai shaikh

maala na japun raat ko be-ashk-fishani

jis samt nazar mauj-e-sarab aave to ye jaan

hovegi kisi zulf-e-chalipa ki nishani

kya kya mile laila-manshan khaak men ‘sauda’

go apne bhi mahbub ki dekhi na javani

Leave a Comment