Azhar Ghauri
bacha le dhuup se aisa koi shajar na mila
kahin suragh-e-vafa qissa muḳhtasar na mila
machal rahe the jabin-e-niyaz men sajde
ye aur baat muqaddar se sang-e-dar na mila
kuredte rahe sab dost mere zaḳhmon ko
sabhi ne tanz kiye koi charagar na mila
vo karbala to nahin doston ki basti thi
taḌapte rah ga.e paani ko buund bhar na mila
hujum yaron ka tha mere saath sahil tak
samundaron men magar koi ham-safar na mila
likha ke laa.e the mahrumiyan muqaddar men
tujhe dua na mili aur mujhe asar na mila
abhi to ashk ki ik buund se ye tufan hai
qadam sambhal le aur aah men sharar na mila
qadam baḌha.e to payab tha har ik dariya
magar talash thi jis ki vahi guhar na mila
ham apni ziist ko karte bhi kya raqam ‘az.har’
varaq mila bhi jo simin to ab-e-zar na mila
Leave a Reply