saaqi ke nam-leva maiḳhane rah ga.e hain
mai-ḳhanon men bhi ḳhali paimane rah ga.e hain
be-maqsad-e-junun hain majnun jo dasht men hain
laila nahin rahi hai divane rah ga.e hain
ban kar jo ik haqiqat duniya pe chha ga.e the
duniya men aaj un ke afsane rah ga.e hain
mahfil rahe tumhari mahfil men tum raho ab
vo kya rahen jo ho kar begane rah ga.e hain
pahchanna ab un ko dushvar ho gaya hai
jo log apne jane-pahchane rah ga.e hain
qabron men sone vaalo tum ko pukarte hain
ishrat-kade jo ban kar gham-ḳhane rah ga.e hain
dekh ai nigah-e-ibrat asar-e-ahd-e-mazi
abadiyon ke ho kar virane rah ga.e hain
ai gosh-e-ibrat un ko tu sun sake to sun le
ye kuchh haqiqaton ke afsane rah ga.e hain
ai sham-e-sub.h-e-mahfil un ko jala ke bujhna
do-char aur tere parvane rah ga.e hain
divanon ko jo ‘bismil’ badnam kar rahe hain
divanon men abhi kuchh farzane rah ga.e hain
Leave a Reply