Ruh Mein Tazgi Nahin Qalb Mein Raushni Nahin

Poet

ruuh men tazgi nahin qalb men raushni nahin

teri qasam tire baghair zindagi zindagi nahin

tazkira-e-ḳhuda nahin silsila-e-ḳhudi nahin

ab main vahan huun jis jagah mere siva koi nahin

sajda-e-dost ke liye chahiye jazb-e-be-ḳhudi

bandagi aur ba-qaid-e-hosh kufr hai bandagi nahin

sust qadam the mehr-o-mah rah ga.e misl-e-gard-e-rah

manzil-e-ishq men mira ham-safar ab koi nahin

zauq-e-talab hai hasil-e-husn-e-tamam-e-ka.enat

talib-e-did bhi to ho javon ki kuchh kami nahin

naghma-e-dil pe jhumna pa-e-sanam ko chumna

zahid-e-ḳhushk-tar abhi vaqif-e-bandagi nahin

‘arzu’ dil ke saath saath hosh-o-ḳhirad bhi phunk de

ishq men arzu-e-ishq shan-e-qalandari nahin