Hayat Warsi
lams biite lamhon ka gudguda raha hoga
ghuncha be-ḳhayali men muskura diya hoga
mera tazkira jab bhi ghair se suna hoga
ḳhud tumhare chehre ka rang uḌ gaya hoga
jis ko kah ke divana marte the patthar se
us ke haath men shayad a.ina raha hoga
hai tumhare chehre par kyon hijab ki shabnam
apne aap ko ham ne bevafa kaha hoga
is ke baad tum ḳhud ko pahron DhunDhte hoge
jab koi pata mera tum se puchhta hoga
dekhte ho hairat se kyon hayat ka daman
maslahat ke kanTon se ye ulajh gaya hoga
Leave a Reply