Afroz Alam
shams maadum hai taron men ziya hai to sahi
chandni raat men mad-mast hava hai to sahi
khvahish-e-ishq ki takmil kahan hoti hai
garche vo shokh nahin shokh-numa hai to sahi
ahaten jaag ke tarikh ko dastak dengi
aas ke siine men ek zakhm hara hai to sahi
sub.h ki raah men zulmat ke sang aate hain
main ne har sang ko thokar pe rakha hai to sahi
haan usi uqde se uljha hai takhayyul ka shuur
yaani uljha hua hathon men sira hai to sahi
jumbish-e-lab se mire daar pe sar aate hain
phir bhi kuchh raaz fazaon men khula hai to sahi
garche main hadi-o-rahbar nahin huun ‘alam’ ka
phir bhi hathon men mere ek asa hai to sahi
Leave a Reply