mujhe ma.asumiyat se dekhta hai
vo dhoka khaa.e hai ya de raha hai
main kitna ajnabi huun apni ḳhatir
mujhe har aadmi pahchanta hai
ajab hai teri yak-rangi ki pyare
jahan tak dekhta huun aa.ina hai
hamari bhuuk se bhuki hai duniya
hamari pyaas se sahra bana hai
nikal bhi lo ki is basti men aksar
darichon se samundar jhankta hai
vo apne haath par mehndi racha kar
muqaddar ki lakiren DhunDhta hai
tire honTon ki nam gola.iyon men
na jaane kis ke dukh ka za.iqa hai
kahin ‘pashi’ kahin ‘alvi’ kahin ‘ashk’
bas ik dukh hai magar ka.i tarah ka hai
Leave a Reply