sirf ik hadd-e-nazar ko asman samjha tha main
asmanon ki haqiqat ko kahan samjha tha main
ḳhud mila aur mil ke vo apna pata bhi de gaya
jabki saari kavishon ko ra.egan samjha tha main
zindagi ka rang pahchana gaya jiine ke ba.ad
duur se us rang ko uḌta dhuan samjha tha main
mehrbanon se hamesha hi rahe shikve gale
aur har na-mehrban ko mehrban samjha tha main
de raha tha vo sada.en aur main ḳhamosh tha
kashmakash ki us ghaḌi ko imtihan samjha tha main
ho gaya huun qatl be-rahmi se un ke samne
haif jin logon ko apna pasban samjha tha main
paas se dekha to jaana kis qadar maghmum hain
an-ginat chehre ki jin ko shadman samjha tha main
Leave a Reply