Poet
zamin-o-asman sab ek se hain
hamare mehrban sab ek se hain
kise apna kahin kis ko paraya
jahan ham hain vahan sab ek se hain
jahan valon ke zahir par na jaao
ye batin men miyan sab ek se hain
nahin kuchh farq tujh men aur mujh men
ki ham ahl-e-jahan sab ek se hain
na kyuun sabit ho jurm-e-be-gunahi
gavahon ke bayan sab ek se hain
vahi guzra hai dil ki rahguzar se
ki qadmon ke nishan sab ek se hain
yahan ke rahne vaale muḳhtalif hain
magar ‘ḳhavar’ makan sab ek se hain
Leave a Reply