agar ḳhuda na kare sach ye ḳhvab ho jaa.e
tiri sahar ho mira aftab ho jaa.e
huzur ariz-o-ruḳhsar kya tamam badan
miri suno to mujassam gulab ho jaa.e
uTha ke phenk do khiḌki se saghar-o-mina
ye tishnagi jo tumhen dastiyab ho jaa.e
vo baat kitni bhali hai jo aap karte hain
suno to siine ki dhaḌkan rabab ho jaa.e
bahut qarib na aao yaqin nahin hoga
ye aarzu bhi agar kamyab ho jaa.e
ghalat kahun to miri aqibat bigaḌti hai
jo sach kahun to ḳhudi be-naqab ho jaa.e
Leave a Reply