Shahab Jafri
hayat men bhi ajal ka saman dikha.i de
vahi zamin vahi asman dikha.i de
qadam zamin se juda hain nazar manazir se
gharib-e-shahr ko shahr asman dikha.i de
tamam shahar men be-chehragi ka aalam hai
jise bhi dekhiye gard aur dhuan dikha.i de
ik ek shaḳhs hujum-e-ravan men tanha hai
ik ek shaḳhs hujum-e-ravan dikha.i de
kabhi suno to makinon ka girya-e-sahari
lahuluhan sa ek ik makan dikha.i de
makin huun main ki musafir ye dasht hai ki dayar
qayam men bhi safar ka saman dikha.i de
darun-e-dil ho ki bairun-e-dil safar apna
kahin lahad kahin ḳhali makan dikha.i de
vo dhuup hai ki sulagta hai saaya paaon tale
ḳhamir-e-ḳhak bhi aag aur dhuan dikha.i de
hai jism sho.ala hi sho.ala to jaan hai pyaas hi pyaas
aur apna saaya sarab-e-tapan dikha.i de
main kis taraf ko baḌhun asman hai na zamin
main jis taraf bhi chalun ḳhauf-e-jan dikha.i de
zamin hai ki falak paanv kis jagah hain nadim!
mujhe bata, mujhe sab kuchh dhuan dikha.i de
sab apne dard ke dozaḳh men jal rahe hain ‘shahab’
magar zamin hamen jannat-nishan dikha.i de
Leave a Reply