Yaad Rakhte Kis Tarah Qisse Kahani Log The

Poet

yaad rakhte kis tarah qisse kahani log the

vo yahan ke the nahin vo asmani log the

sukhe peḌon ki qataren roktin kab tak unhen

uḌ ga.e karte bhi kya barg-e-ḳhizani log the

zindagi ankhon pe rakh kar haath pichhe chhup ga.i

darmiyan rah kar bhi sab ke an-jahani log the

kal yahin par lahlahati thiin hansi ki khetiyan

kal yahin par kaise kaise za.afrani log the

TuuT kar bikhre hue hain qurbaton ke silsile

chhup ga.e jaane kahan jo darmiyani log the

ḳhushk miTTi ban ga.e to bundiyan nahla ga.iin

aur hamen kya chahiye tha aag paani log the