duniya ke imtihan men kya kya sila mila
lamha-ba-lamha ek naya hadisa mila
ḳhud-bin-o-ḳhud-shanas hai vo is liye mujhe
vo shaḳhs jab kabhi mila gham-ashna mila
lahron ke siva kuchh bhi na tha duur duur tak
tufan men kinara to nahin haan ḳhuda mila
main kya bata.un kitne ta.ajjub ki baat thi
jab bevafa main mujh ko nishan-e-vafa mila
‘faisal’ farebi yaron ki honi lagi hai zid
dil ke qarib jo bhi tha vo ḳhud-numa mila
Leave a Reply