jahan main khadi thi
vahan se qadam, do qadam hi ka rasta tha
jis ja pe mausam badalne ko tayyar baithe the
mere ye bas men nahin tha ki main
apni khidki ke aage pighalte hue
manzaron men koi
apni marzi ka hi rang bhar duun
khizan ki akadti hui zard banhon ko
apne jharoke ke aage ye bad-rang piile manazir
sajane se hi rok paun
darakhton ki mazbut shakhon se daman chhudate
hue zard patton ko rokun
bikharte hue phuul lachkili, sarsabz shakhon pe phir se khilaun
havaon ki pazhmurda sanson men phir zindagi daud jaae
parindon ki chahkar ubhre, nadi muskurae
jahan main khadi thi
vahan se qadam, do qadam hi ka rasta tha
raste men bikhre hue kitne pal the
adhure safar the
magar mere bas men nahin tha ki main
saare bikhre hue pal hi tartib de duun
masafat ke maare hue raste manzilon se mila duun
ulajhti huii, sar patakhti hui tund maujon ke aage kinare bichha duun
jahan main khadi thi
vahan se qadam, do qadam hi ka rasta tha
jis ja pe duniya thii, thahra hua vaqt tha
jis jagah zindagi thi
magar mere bas men nahin tha ki main
zindagi se ye kah duun
ki thahre hue vaqt se aage kuchh pal nikalne na paae
ye duniya ko ja ke batae
mujhe saans lene ko thodi jagah chahiye
vaqt ka ek ujala kinara mile
zindagi se kuchh aisa ishara mile
is zamane ka hi saath saara mile
main use ja ke kah duun
magar mere bas men nahin tha ki main
apni banhen uthaun
qadam ko badhaun
nigahon se us ko bulaun
use kah hi paun
ki hai ye qadam, do qadam hi ka rasta
jahan main khadi huun!
Leave a Reply