mujh ko sham-e-hijr ki ye jalva-ara.i bahut
mahki mahki yaad teri aur tanha.i bahut
umr bhar Darta raha kam-zarfi-e-ehsas se
un ke pahlu men bhi meri ruuh ghabra.i bahut
Duub kar un jhiil si ankhon men jab ghazlen kahin
mere in sheron men tab aa.i hai gahra.i bahut
ham hi kyuun teri mohabbat men tamasha ban ga.e
is hayat-e-rang-o-bu men the tamasha.i bahut
rafta rafta us gali men be-jhijak jaane laga
pahle pahle to mujhe tha ḳhauf-e-rusva.i bahut
vo khanakte gungunate jhumte gaate badan
ahd-e-piri men javani ham ko yaad aa.i bahut
dahki dahki aag si anchal men thi shayad ‘shahab’
paas se vo shoḳh jab guzra to aanch aa.i bahut
Leave a Reply