jo ab javan hai vo azm-e-javan rahe na rahe
bahar aa.e na aa.e ḳhizan rahe na rahe
pata nahin ki samundar men bad-e-tufan bhi
safina ho ke na ho badban rahe na rahe
qadam qadam pe ugi ranjishon ke aalam men
javar-e-yar dar-e-dostan rahe na rahe
ghar apna bhar lo abhi ḳhair hai ujalon se
jab andhiyan hon diya zau-fishan rahe na rahe
ham inqalab ka baa.is jise samajhte hain
vo garm ḳhuun ragon men ravan rahe na rahe
nafas nafas hai sharabor jis ki nik.hat se
vo gul khilen na khilen gulsitan rahe na rahe
bhaTak rahe hain nishanon se tiir ab us ke
kaḌi abhi bhi vo dekho kaman rahe na rahe
abhi ubhar lo alfaz jo dabe hon ‘nihal’
dahan ke saath hamesha zaban rahe na rahe
Leave a Reply