Liyaqat Ali Aasim
phir vahi be-dili phir vahi ma.azarat
bas bahut ho chuka zindagi ma.azarat
ḳhud-kalami se bhi ruuTh jaati hai tu
ab na bolunga ai ḳhamushi ma.azarat
dhuup Dhal bhi chuki saa.e uTh bhi chuke
ab mire yaar kis baat ki ma.azarat
daad be-dad men dil nahin lag raha
dosto shukriya sha.eri ma.azarat
be-ḳhudi men ḳhuda.i ka da.ava kiya
ai ḳhuda dar-guzar ai ḳhudi ma.azarat
tujh se guzri hui zindagi maang li
rabb-e-imroz-o-farda-o-di ma.azarat
ik nazar us ne dekha hai ‘asim’ chalo
duur hi se sahi ho chuki ma.azarat
Leave a Reply