main ḳhud gaya na us ki ada le ga.i mujhe
maqtal men rasm-e-pas-e-vafa le ga.i mujhe
andar se khokhla jo tha ballōn ki tarah
chaha jidhar hava ne uḌa le ga.i mujhe
ik harf tha jo tum ne suna an-suna kiya
ab DhunDte phiro ki sada le ga.i mujhe
sahil se mera paanv phisalne ki der thi
ik mauj-e-be-panah baha le ga.i mujhe
baiTha tha chhup ke os ki ThanDi phuvar men
aa.i kaḌakti dhuup uTha le ga.i mujhe
jaata kahan ki aage koi rasta na tha
andhi gupha men meri ana le ga.i mujhe
‘sabir’ main reza reza ḳhala men bikhar gaya
itni bulandiyon pe hava le ga.i mujhe
Leave a Reply