salman ke naam
vo pal
jab tumhen kokh se jan ke
ummid-o-imkan ka taara samajh kar
main ne aghosh men bhar liya tha
vo pal
surkh kaliyon ko jab
apne siine ki dhara se sincha tha
aur apni hi tishnagi ka mudava kiya tha
ek nanhe se chehre ke
nazuk khadd-o-khal men Duub kar
jab miri ruuh parvan chadhne lagi thi
vo pal
jab miri shab guzari ki
mehnat-kashi men
tumhari numu ki guhar-bar asudgi thi
vo pal
rahat-e-maujud-o-imkan
jab miri god men so gai thi
vo pal
jab miri aatma
aur parmatma
ik madhur ruup men Dhal gae the
mere angan men
maasum si raushni thi
vo pal
vaqt ki rahguzar men
bahut duur pichhe kahin rah gaya hai
ghubar-e-safar ke dhundlakon men
nazron se ojhal hua hai
aur ab
jab ki tum aae ho
apne hi ghar men mehman ban ke
tumhen duur jaana hai
masruf ho
vaqt thoda hai
aage miri zindagi ki Dagar par
saat-e-vapsin muntazir hai
is ghadi
garche meri ghadi apni raftar se chal rahi hai
magar
meri ankhon ki sukhi nami
purane kivadon ki chaukhat men
na jaane kyuun
jazb hone lagi hai
aur
is ghar ke divar-o-dar apni apni jagah chup khade hain