hai rashk-e-vasl se gham-e-dildar hi bhala
rahat se aisi ham ko vo dil-azar hi bhala
duniya men yaaro yar-e-vafadar hi nahin
aur jo na ho to rahna hai be-yar hi bhala
maashuq ka nazara mayassar ho ya na ho
ashiq hamesha talib-e-didar hi bhala
zaari pe meri rahm bhi kar aa khuda ko maan
kafir rahega ham se tu bezar hi bhala
atvar-e-bad hai ghair se khulta mire huzur
is ke evaz na kar tu hamen pyaar hi bhala
zakhmon se gham ke tera kaleja to chhil gaya
bulbul hai aise gul se tujhe khaar hi bhala
ik jura dard-e-mai pe ho itna na talkh-o-tund
saaqi main aise mast se hoshyar hi bhala
‘hasrat’ bura kiya main uthaya dil us se kyuun
dildar gar na tha to dil-azar hi bhala