Poet
makan hi na bana.e ga.e zamin kam thi
shajar hava men ugaa.e ga.e zamin kam thi
main us jagah huun jahan se palaT ke suraj men
panah DhunDne saa.e ga.e zamin kam thi
bashar muqim the qabron men aur na.e murde
samundaron men baha.e ga.e zamin kam thi
hamen bhi lauT hi jaana hai ham se pahle bhi
sab asman pe uTha.e ga.e zamin kam thi
tamam umr kaTi ik jagah khaḌe rah kar
kabhi na ham kahin aa.e ga.e zamin kam thi
ye ka.enat-e-safar tha so raat paḌte hi
ham asman sara.e ga.e zamin kam thi
buzurg ab-e-baqa pi chuke the aur bachche
vajud hi men na laa.e ga.e zamin kam thi
ḳhuda ne adam-o-havva ko kar diya paida
phir aadmi na bana.e ga.e zamin kam thi
ham apne aap ko ‘akash’ ghar samajhte rahe
hamesha ḳhud hi men paa.e ga.e zamin kam thi
Leave a Reply