Aftab Hussain
karta kuchh aur hai vo dikhata kuchh aur hai
dar-asl silsila pas-e-parda kuchh aur hai
har-dam taghayyurat ki zad men hai kaenat
dekhen palak jhapak ke to naqsha kuchh aur hai
jo kuchh nigah men hai haqiqat men vo nahin
jo tere samne hai tamasha kuchh aur hai
rakh vadi-e-junun men qadam phunk phunk kar
ai be-khabar sambhal ki ye rishta kuchh aur hai
tahrir aur kuchh hai sar-e-matn-e-zindagi
aur hashiye men hai jo havala kuchh aur hai
har-chand dil dhadakta hai pal pal ghadi ghadi
lekin jo aaj dil ko hai dhadka kuchh aur hai
itni bhi ehtiyat na kar jaan ‘aftab’
khadshe kuchh aur hote hain hota kuchh aur hai
Leave a Reply