ḳhat men ubhar rahi hai tasvir dhire dhire
gum hoti ja rahi hai tahrir dhire dhire
ehsas tujh ko hoga zindan ka rafta-rafta
tujh par khulegi teri zanjir dhire dhire
mujh se hi kaam mere Talte chale ga.e hain
hoti chali ga.i hai taḳhir dhire dhire
taqdir rang apna dikhla rahi hai pal pal
be-rang ho chali hai tadbir dhire dhire
ankhon men ek aansu bhi ab nahin bacha hai
ham ne luTa di saari jagir dhire dhire
dekha hai jab se us ko lagta hai jaise dil men
paivast ho raha hai ik tiir dhire dhire
asan nahin tha gham ko lafzon men jazb karna
aa.i mire suḳhan men tasir dhire dhire
Leave a Reply