yaad a.enge zamane ko misalon ke liye
jaise bosida kitaben hon havalon ke liye
dekh yuun vaqt ki dahliz se Takra ke na gir
raste band nahin sochne valon ke liye
aao ta.amir karen apni vafa ka ma.abad
ham na masjid ke liye hain na shivalon ke liye
salha-sal aqidat se khula rahta hai
munfarid rahon ka aghosh jiyalon ke liye
raat ka karb hai gulbang-e-sahar ka ḳhaliq
pyaar ka giit hai ye dard ujalon ke liye
shab-e-furqat men sulagti hui yadon ke siva
aur kya rakkha hai ham chahne valon ke liye
Leave a Reply