mahrum-e-tarab hai dil-e-dil-gir abhi tak
baaqi hai tire ishq ki tasir abhi tak
vasl us but-e-bad-khu ka mayassar nahin hota
vabasta-e-taqdir hai tadbir abhi tak
ik baar suni thi so mire dil men hai maujud
ai jan-e-tamanna tiri taqrir abhi tak
sikhi thi jo aghaz-e-mohabbat men qalam ne
baaqi hai vo rangini-e-tahrir abhi tak
is darja na betab ho ai shauq-e-shahadat
hai miyan men us shokh ki shamshir abhi tak
kahne ko to main bhuul gaya huun magar ai yaar
hai khana-e-dil men tiri tasvir abhi tak
bhuli nahin dil ko tiri duzdida-nigahi
pahlu men hai kuchh kuchh khalish-e-tir abhi tak
the haq pe vo be-shak ki na hote to na hota
duniya men bapa matam-e-‘shabbir’ abhi tak
guzre bahut ustad magar rang-e-asar men
be-misl hai ‘hasrat’ sukhan-e-‘mir’ abhi tak
Leave a Reply