Gham Ro Ro Ke Kahta Hun Kuchh Us Se Agar Apna

gham ro ro ke kahta huun kuchh us se agar apna

to hans ke vo bole hai ”miyan fikr kar apna”

rone se tire kya kahen ai dida-e-khun-bar

ye khaak men milta hai dil apna jigar apna

gar baithte hain mahfil-e-khuban men ham us bin

sar zaanu se uthta nahin do do pahar apna

laana hai to hamdam use la jald ki ham ko

ahval nazar aae hai nau-e-digar apna

baton se kate kis ki bhala raah hamari

ghurbat ke siva koi nahin ham-safar apna

aalam men hai ghar ghar khushi-o-aish par us bin

matam-kada ham ko nazar aata hai ghar apna

ya ankhon se ik aan na hota tha vo ojhal

ya jalva dikhata nahin ab ik nazar apna

har baat ka behtar hai chhupana hi ki ye bhi

hai aib kare koi jo zahir hunar apna

gar ru-ba-ru us ke kisi gham-khvar ko chupke

kuchh haal sunata huun main ba-chashm-e-tar apna

to kya kahun kahta hai ajab shakl se mujh ko

kuchh honton hi honton men vo munh pher kar apna

kya kya use dekh aati hai ‘jurat’ hamen hasrat

mayus jo phir aata hai paigham-bar apna

Leave a Comment