Aslam Kolsarii
yaar ko dida-e-ḳhun-bar se ojhal kar ke
mujh ko halat ne maara hai mukammal kar ke
janib-e-shahr faqiron ki tarah koh-e-giran
phenk deta hai buḳharat ko badal kar ke
jal uThen ruuh ke ghaav to chhiḌak deta huun
chandni men tiri yadon ki mahak hal kar ke
dil vo majzub mughanni ki jala deta hai
ek hi aah se har ḳhvab ko jal-thal kar ke
jaane kis lamha-e-vahshi ki talab hai ki falak
dekhna chahe mire shahr ko jangal kar ke
ya.ani tartib-e-karam ka bhi saliqa tha use
us ne patthar bhi uThaya mujhe pagal kar ke
iid ka din hai so kamre men paḌa huun ‘aslam’
apne darvaze ko bahar se muqaffal kar ke
Leave a Reply