idhar to ham jaan kho rahe hain udhar vo ulfat se ro rahe hain
kuduraten umr bhar ki dil se vo aaj ashkon men dho rahe hain
na baaz rakh ham ko rone se tu giren jo ashkon ke daane bahattar
ye kisht-e-hasrat men apni hamdam umiid ka tukhm bo rahe hain
idhar taraqqi khayal ko hai udhar taraqqi jamal ko hai
vahan to madd-e-nazar hai surma yahan tasavvur men ro rahe hain
jahan hua tifl koi paida kaha ye maan ne abul-bashar ki
miri bhi aghosh hai kushada abas ye saman ho rahe hain
kiya hai be-jurm qatl mujh ko hujum-e-aghyar-o-ashna men
aur is pe dekho Dhitai ashkon se daman apna bhigo rahe hain
na puchho kuchh maasiyat ka aalam farishto ham kya ki tum ne bachte
haqiqat is ki unhin se puchho sara-e-duniya men jo rahe hain
khabar visal-e-adu ki sun kar visal ke maani sochte hain
unhin ko vaan kuchh nahin hai shadi ki khush yahan ham bhi ho rahe hain
gila abas un se kiije ‘aqil’ kiya hai qismat ne un ko ghafil
jo dar pe ja kar pukara main ne to bole kah do ki so rahe hain