main vo huun jis ka zamane ne sabaq yaad kiya
gham ne shagird kiya phir mujhe ustad kiya
husn-e-jan-soz ne vahdat men mujhe yaad kiya
main ye samjha ki mujhe ishq ne barbad kiya
nahin ma.alum vo main huun ki koi aur asiir
sun raha huun ki giraftar ko azad kiya
jis jagah khaa.i thi Thokar vahin turbat thi miri
bhulne vaale ne mushkil se mujhe yaad kiya
meri aahon ki havaon men na aa jaana tum
ye vahi hain ki jinhon ne mujhe barbad kiya
ḳhana-e-qabr ajab chiiz hai lekin main ne
itne TukḌe ko bhi ik umr men abad kiya
yas-o-ummid ke mabain hui ḳhatm hayat
ek ne shaad kiya ek ne nashad kiya
tujh ko sab dete hain avaz vo apne hon ki ghair
is taraf main ne mo.azzin ne udhar yaad kiya
main tha ik ḳhaak ki chuTki to uḌa jaata huun
ḳhaak ka vo bhi hai zarra jise sayyad kiya
kis se luun dad-e-vafa kis ko dikha.un ye jafa
vo to parde men hai jis ne mujhe ijad kiya
ishq men apne hi hathon se hua do TukḌe
dil-e-nakam ne kar-e-sar-e-farhad kiya
na-tavani men gire the jo lahu ke qatre
main to bhula hua tha dil ne bahut yaad kiya
ashk ankhon se gire ḳhuun ragon men jo na tha
main ne aḳhir adab-e-nashtar-e-fassad kiya
zarre zarre se miri ḳhaak ye deti hai sada
rahe abad vo jis ne mujhe barbad kiya
ek sannaTa sa aalam men tha lekin main ne
fat.h bab-e-asar-e-nala-o-faryad kiya
jitne shikve hain tujhi se hain ki is aalam men
mujh ko bulbul kiya sayyad ko sayyad kiya
rasta chalne ke qabil na raha ai hamdam
main ne manzil pe naya marhala ijad kiya
main to chyunTi ke kuchalne se hazar rakhta tha
phir mujhe kis ne tah-e-zanu-e-jallad kiya
itna zinda rahe ham jis se khulin ma.ani-e-maut
sub.h-e-ijad men qasd-e-adam abad kiya
bu nikalne lagi ghunchon se to phir Dar kis ka
ye ḳhabar sach hai to sayyad ne azad kiya
qabl-az-vaqt phansa daam men aur phanste hi
jo tamanna yahan laa.i thi use yaad kiya
alam-e-husn hai vo naqsh-e-ma.ani ‘saqib’
jo miri tab-e-ḳhuda-dad ne ijad kiya
Leave a Reply