in andheron se pare is shab-e-gham se aage
ik na.i sub.h bhi hai sham-e-alam se aage
dasht men kis se karen abla-pa.i ka gila
rahnuma koi nahin naqsh-e-qadam se aage
saaz men kho.e rahe soz na samjha koi
dard ki Tiis thi pazeb ki chham se aage
ai ḳhosha azm-e-javan zauq-e-safar josh-e-talab
hadse baḌh na sake apne qadam se aage
yaad hai lazzat-e-azar-e-mohabbat ab tak
dil ko milta tha sukun mashq-e-sitam se aage
surḳh-ru hai jahan tariḳh-e-do-alam ‘ishrat’
ḳhuun Tapka hai vahin nok-e-qalam se aage
Leave a Reply