Wo Mere KHwab Ki Tabir to Batae Mujhe

Tariq Qamar

vo mere ḳhvab ki ta.abir to bata.e mujhe

main dhuup men huun magar DhunDte hain saa.e mujhe

main raushni ki kisi saltanat ka shahzada

magar charagh mile hain bujhe-bujha.e mujhe

vo ja chuka hai to naqsh-e-qadam bhi miT jaa.en

bichhaḌ gaya hai to ab yaad bhi na aa.e mujhe

kisi javaz ka hona hi kya zaruri hai

agar vo chhoḌna chahe to chhoḌ jaa.e mujhe

to motiyon men na tulne ka ranj ḳhatm hua

kisi ki aankh ke aansu ḳharid laa.e mujhe

larazte kanpte hathon ko phir na ho zahmat

ḳhuda kare ki yahi zahr raas aa.e mujhe

main chahta huun kabhi yuun bhi ho ki meri tarah

vo mujh ko DhunDne nikle magar na paa.e mujhe