hangam-e-shab-o-roz men uljha hua kyuun huun
dariya huun to phir raah men Thahra hua kyuun huun
kyuun meri jaḌen ja ke zamin se nahin miltin
gamle ki tarah sahn men rakkha hua kyuun huun
is ghar ke makinon ka ravayya bhi to dekhun
taz.in-e-dar-o-bam men khoya hua kyuun huun
girti nahin kyuun mujh pe kisi zaḳhm ki shabnam
main qafila-e-dard se bachhḌa hua kyuun huun
ankhon pe jo utra na hua dil pe jo tahrir
us ḳhvab ki ta.abir se sahma hua kyuun huun
din bhar ke jhamelon se bacha laaya tha ḳhud ko
shaam aate hi ‘ashfaq’ main TuuTa hua kyuun huun
Leave a Reply