Shahnaz Parveen Sahar
koi shafqat bhari sarkar nahin hai ghar men
jab se baaba ki vo dastar nahin hai ghar men
umr ki baḌhti thakan saans ki bimar ghuTan
ek kamra bhi hava-dar nahin hai ghar men
dukh suna.en kabhi ghabra.en to sar Takra.en
is tarah ki koi divar nahin hai ghar men
kabhi avaz men marham kabhi mathe pe shikan
main samajhti thi adakar nahin hai ghar men
moh leta hai vo guftar se duniya bhar ko
baat karne ka ravadar nahin hai ghar men
jaan le lete hain kuchh sard ravayye aksar
ham samajhte hain ki talvar nahin hai ghar men
vo ayadat ke bahane se agar aa bhi gaya
us se kah dena ki bimar nahin hai ghar men
kaun hai jo tumhen jaate hue rokega ‘sahar’
kuchh rukavaT koi inkar nahin hai ghar men
Leave a Reply