vo khub-surat ladkiyan
dasht-e-vafa ki hirniyan
-shahr-e-shab-e-mahtab ki
bechain jadu-garniyan
jo badalon men kho gaiin
nazron se ojhal ho gaiin
ab sard kaali raat ko
ankhon men gahra gham liye
ashkon ki bahti nahr men
gulnar chehre nam kiye
hasti ki sarhad se pare
khvabon ki sangin ot se
kahti hain mujh ko bevafa
ham se bichhad kar kya tujhe
sukh ka khazana mil gaya
Leave a Reply