Naseem Nikhat
ḳhayalon ki bulandi zaat ki khaa.i se behtar hai
samundar tera sahil teri gahra.i se behtar hai
ye maila pairahan kirdar ki kaa.i se behtar hai
bhala.i ke liye ik jhuuT sachcha.i se behtar hai
mire munsif saza de ya mujhe insaf jaldi de
tira har faisla barson men sunva.i se behtar hai
agar manzil na mil paa.e to raste men Thahar jaao
safar mauquf karna abla-pa.i se behtar hai
mire har dard ko mahsus karna banTana har gham
haqiqat ye hai vo mere sage bhaa.i se behtar hai
sukun milta hai duniya bhar ke jhagḌon se yahan aa kar
ye daftar ki imarat ghar ki angna.i se behtar hai
saḌak par yunhi avara bhaTakna achchha lagta hai
yahan jo shor hai andar ki tanha.i se behtar hai
miri umr-e-ravan ke saath ye bhi baḌhta jaata hai
mira beTa miri ankhon ki bina.i se behtar hai
kam-az-kam ghair ruk kar ḳhairiyat to puchh lete hain
suna hai ajnabiyyat ab shanasa.i se behtar hai
kiya hai muntaḳhab beTi ne jis ko tum bhi apna lo
zamana kah raha hai ghar ki rusva.i se behtar hai
Leave a Reply