dekh kar ye chalan tumhare ham
ḳhaak men mil ga.e bechare ham
jin hain ya dev bhuut hain kya hain
nahin lagte jo tum ko pyare ham
be-qarari se dil ki shab ko haa.e
dar pe us ke bahut pukare ham
ye jo gulzar sa hai ruḳh tera
lenge is baagh ko ijare ham
daagh ik tohfa le ke hasti men
su-e-mulk-e-adam sidhare ham
raat mahfil men kaan men us ke
kah ke kuchh ho ga.e kinare ham
‘muntazir’ dil ne dukh diya ye ki bas
mar ga.e dard-o-gham ke maare ham
Leave a Reply